تازه مطالب
Home » مرکې » له سيف الله مستنير سره د حزب التحریر په اړه د ژمن مرکه
له سيف الله مستنير سره د حزب التحریر په اړه د ژمن مرکه
د حزب التحرير مرکزي څانګه، لبنان

له سيف الله مستنير سره د حزب التحریر په اړه د ژمن مرکه

د ژمن خبره

ژمن انټرنټي پاڼه غواړي چې د خپلو لوستونکو په وړاندې هغه باب خلاص کړي چې چا لاس نه وي وروړی او داسې معلومات له لومړۍ مرجع څخه وروړاندې کړي چې د کره والي او اهميت له اړخه په لومړي کتار کې وي. کلونه کېږي چې حزب التحرير په افغانستان کې فعاليت لري او هلته و دلته يې په اړه خبرې او تبصرې کېږي، موږ وغوښتل چې د دوی د مطبوعاتي دفتر له رييس سیف الله مستنیر سره مرکه وکړو، او ځينې مهم مسايل ورسره مطرح کړو.

ژمن: حزب التحرير چا جوړ کړی؟ کله؟ په څه انګېزه؟ او اوس يې مشر څوک دی؟

مستنير: بسم الله الرحمن الرحيم- کله چې په اسلامي امت کې دوه لوی ټکانونه او ستونزې رامنځ ته شوې، چې يوه يې د کمال اتاتورک په لاس په ۱۹۲۴م کال کې د عثماني خلافت نړېدل وو او بيا وروسته د انګلستان او امريکا له خوا د اسلامي امت په زړه کې د صهيونېستي رژيم جوړېدل وو چې اسلامي امت ته يې سخت ټکان ورکړ؛ د دې ټکانونو په نتيجه کې مختلف اسلامي حرکتونه رامنځ ته شول، د اسلامي امت د يووالي هڅې يې کولې؛ خو ځينې حرکتونه په مختلفو دلايلو ناکام، تجزيه او يا له ګڼو نورو ستونزو سره مخ شول.

شيخ تقي الدين نبهاني چې د فلسطين د النبهان له قبيلې څخه په يوه علمي کورنۍ کې دنيا ته راغلی و، خپله هم د خپل پلار او نېکه په څېر د دين لوی عالم او فقیه شو. هغه د يو شمېر نورو علماوو په مشوره نبوي سنتو او سيرت ته مراجعه وکړه او هڅه يې وکړه چې اوسني حالت ته د سنتو او سيرت په رڼا کې علاج پيدا کړي. هغه وليدل چې په اسلامي نړۍ کې پلي کېدونکي نظامونه کفري نظامونه دي، او په هېڅ ځای کې د اسلام مرکز نه و پاتې. نو اوسنی حالت يې د اصلاح وړ نه بلکې د تغيير او بنسټيز بدلون وړ وباله. یعنې هغوی دا واقعيت دار کفر تعريف کړ او د حزب التحرير له نظره دا د امت وجيبه ده چې اسلامي نړۍ په دار الاسلام بدله کړي.

شيخ نبهاني او نورو فکري ملګرو يې حزب التحرير په ۱۹۵۳م کال کې په بيت المقدس کې جوړ کړ، خو له يوې اوونۍ فعاليت وروسته، له پنځو موسسو غړو څخه يې څلور تنه بندي او پر حزب هم بنديز ولګېده. له دې سره هم دوی د حزب د افکارو د خپرولو له پاره کار ته دوام ورکړ. د شيخ نبهاني د مشرۍ پر مهال، په فلسطين، اردن، سوريه او لبنان کې د حزب فکر خپور شو، مختلفې تثقيفي حلقې جوړې شوې او له امت سره ډله ييز تفاعل (فکري عمل او سياسي مبارزه) پيل شوه.

شيخ نبهاني د فکر د خپراوي په لاره کې له ډېرو ستونزو سره مخ شو او ډېر وارې بندې هم شو. په وروستي وار، په عراق کې ونيول شو، او تر دې حده تعذيب شو چې دواړه لاسونه يې فلج شول. دا چې نبهاني هر چېرته خپله څېره بدلوله، عراقي چارواکو نه پېژانده خو شکمن وو. عراقيانو يې شاګرد ورته راوستو، چې څو څپېړې يې ووهي، شاګرد يې د دې له پاره چې راز يې افشا نه شي، خپل امير څو څپېړې وواهه. مخکې تر دې چې د اردن د حکومت ليک عراق ته ورسېږي او خبر يې کړي چې همدا نيول شوی سړی شيخ نبهاني دی، دوی يې د لبنان په پوله په داسې حالت کې خوشې کوي چې لاسونه يې فلج شوي وو.

بيا لبنان ته ځي او هلته د ژوند تر پايه پاتې کېږي او همالته وفات کېږي. د ده له مړينې وروسته د حزب التحرير امارت شيخ عبد القديم زلوم په غاړه اخلي، چې دی هم د حزب د لارښودې حلقې له غړو څخه وو. هغه هم فلسطينی عالم و او الازهر يې لوستی و. تر ۲۰۰۳م کاله پورې دی د حزب التحرير امير پاتې شو. د ده د امارت پر مهال د حزب دعوت منځنۍ آسيا، اروپا، پاکستان، هندوستان او نورو سيمو ته رسېږي.

په ۲۰۰۳م کال کې د ده له وفاته څلوېښت ورځې مخکې، د جسمي کمزورۍ له امله يې استعفا وکړه او د ده پر ځای شيخ عطاء ابن خليل ابو رشته د حزب التحرير امير کېږي، چې تر دې مخکې د حزب التحرير د اردن ولایت وياند و. شيخ عطا هم فلسطينی انجينيراو عالم دی، الازهر يې لوستی، فقهي او اصولي عالم او مجتهد هم دی. تر ننه پورې همدی د حزب التحرير امير دی. اوس د منځني ختيځ په هېوادونو کې له استعمار نه پټ اوسېږي، زه نه شم واضح کولای چې چېرته اوسېږي. دی هم لسګونه کلونه د سعودي، اردن، ليبيا او نورو مختلفو عربي هېوادونو په زندانو کې بندي شوی دی.

ژمن: افغانستان ته دا فکر، کله او د چا په واسطه راوړل شو؟

مستنير: له روسانو سره د جهاد دورې په اوايلو کې د کونړ او ننګرهار ځينې ځوانانو دغه فکر او دعوت پیل کړی و، خو دا چې د جهاد وخت و، مخکې له دې چې دوی په افغانانو کې نفوذ وکړي، دوی شهيدان شول. له دې وروسته حزب په افغانستان کې مناسب کسان نه لرل، نو تر ۲۰۰۳م کاله پورې يې دلته کوم فعاليت نه لاره. په ۲۰۰۳م کال کې حزب وتوانېده چې په افغانستان کې يو وار بيا خپله لومړنۍ هسته رامنځ ته کړي او تر ننه يې دعوت جريان لري.

په افغانستان کې د حزب التحرير بنسټګر او مشر ځکه نه شو ښکاره کولای، چې استعمار په اسلامي حرکتونو کې ننوځي او د تجزيې او نورو ستونزو د رامنځ ته کولو له پاره يې هڅې کوي. د همدې له پاره موږ تل خپل اداري سېستم پټ ساتلی دی. په افغانستان کې د حزب التحرير مشر زموږ يو ورور دی، او د ابو الرشته تر مستقيمې مشرۍ لاندې دلته فعاليت کوي.

ژمن: په افغانستان کې حزب التحرير پټ يا ښکاره دفتر لري؟

مستنير: دا چې موږ د افغانستان اساسي قانون يو استعماري او د خلکو په رايه جوړ شوی قانون بولو، له اسلام نه يې لرې بولو، ولو که د اسلام يادونه په کې شوې، خو دلته اسلام نه شته، بلکې ملنډې ورپورې وهل شوې دي.. نو دا چې موږ د افغانستان اساسي قانون او د هغې پر اساس جوړ شوي قوانين نه منو، نو موږ په وزارت عدليه کې رسمي نه يو او دفتر هم نه لرو.

که چېرته په افغانستان کې د احزابو رسمي کېدل يوازې د علم او خبر د يوه مکتوب په واسطه وای، موږ به خپل ګوند رسمي کړی وای، خو اوس داسې نه دي. مثلا په لبنان کې زموږ ګوند رسمي دی، ځکه چې هلته د احزابو قانون د عثماني خلافت قانون دی. هلته يوازې حکومت خبرول کېږي چې موږ فعاليتونه لرو، نور تحميلونه نه شته؛ خو افغانستان کې بايد اساسي قانون او نور قوانين ومنو او په ملي محدوده کې کار وکړو، چې د اسلام او امت له طبيعت سره بشپړ ټکر لري.

ژمن: د افغانستان حکومت کې خو ستاسې غړي کار کوي؟

مستنير: هو، د افغانستان حکومت کې، زموږ غړي په هغو پوسټونو کې کار کوي چې جواز لري. لکه د مشاوريت پوسټ، اداري ماموريت… ولې په حکمي پوسټونو کې، چېرته چې د مسؤول لاسليک حاکميت تامينوي، لکه والي، ولسوال، معين، وزير او نور پوسټونه چې حکمي بلل کېږي، دغسې پوسټونو کې زموږ کسان کار نه شي کولای. د اشغالګرو تر فرمان لاندې په  وسله والو او استخباراتي ځواکونو کې موږ ته کار حرام دی، ځکه چې عملا له مسلمانانو سره جګړه کوي. نو موږ ته يوازې حلالو پوسټونو کې کار جواز لري او بس.

ژمن: که همدې «حلالو» پوسټونو ته ژور وګورو، د همدغه حکومت جز دي. دې کې شک نه شته چې مهمو پوسټونو باندې حکومت ولاړ دی، خو دا واړه پوسټونه همدغه حکومتونه تکميلوي. تاسې حکومت کافروئ، خو بيا په کې حلال کارونه هم وينئ!

مستنير: دا فقهي موضوع ده. په مکي دور کې اصحابو له کفارو سره مزدوري او کارګري کړې ده او نور کارونه يې ورته کړي دي. يعنې په دار الحرب کې هم يو شمېر کارونه روا دي.

په پوسټونو کې بايد دوو واقعيتونو ته وکتل شي. يو دا چې ستا قرارداد چا سره دی، بل دا چې واقعيت د پوسټ څه دی؟ که واقعيت د پوسټ حاکميت و، تجسس و، د مسلمانانو وژل او دې ته ورته کارونه وو، دا د واقعيت پر اساس حرام دي. بله دا چې که چېرته قرارداد له بالفعل محارب سره و، يعنې له څلوېښتو هېوادونو سره چې افغانستان يې اشغال کړی دی او يا هر هغه هېواد چې د نړۍ په کوم ګوټ کې له مسلمانانو سره جګړه کوي، بيا که د پوسټ واقعيت حلال هم وي، قرارداد حرام دی. پر همدې اساس، موږ نه له کفارو سره کار کوو او نه په حرامو پوسټونو کې کار کوو.

دا چې ټول پوسټونه ناروا دي، داسې نه ده. رسول الله صلی الله عليه وسلم هم دا کار نه و کړی، سره له دې چې هغه وخت مقابل لوري کې يوازې کفار وو، نن خو په حکومت کې مسلمانان دي او له اسلام سره يوه همدردي لري، خو د خپلو ګټو، مصلحت او يا وېرې له مخې په کې کارکوي، نور هغوی هم په دغه ناروا حکومتونو باندې تر ډېره رضايت نه لري.

ژمن: په افغانستان کې حزب التحرير څومره کسان لري؟

مستنير: دا داسې يوه پوښتنه ده، چې موږ هېڅ ځای کې نه ده ځواب کړې او بايد همداسې پاتې وي. مګر دا اوس ټولو نړيوالو ته ثابته ده، چې موږ يو لوی، نړيوال، پياوړی، فکري او سياسي حزب يو، چې له امت سره محاسبه کوو، زموږ دنده دا ده چې بايد امت پوه کړو، د کفري نظامونو پر وړاندې يې راپاڅوو او د رسول الله په طريقه يې يوه بشپړ سياسي نظام ته وهڅوو.

ژمن: د دې له پاره تعداد نه ښکاره کوئ، چې که لږ وي، غړي مو مايوس نه شي؟

مستنير: نه، خو تاسې فکر وکړئ، دا چې په کابل پوهنتون کې د حزب التحرير غړي په زرګونو کسان راوباسي، يا په اندونيزيا کې د خلافت د سقوط په ورځو کې دوه اويا کنفرانسه وکړي او په هر کنفرانس کې په لس ګونو زره کسان په کې برخه واخلي، او د رجب د اته ويشتمې په يوه کنفرانس کې تر ۱۴۰۰۰۰ ډېر کسان برخه اخلي، دا د حزب التحرير قوت ښکاره کوي.

ژمن: په افغانستان کې د لاريونو امتياز يوازې حزب التحرير ته ځکه نه شي ورکول کېدای، چې دا خلک مسلمانان دي، او د اسلامي مسايلو له پاره له هر چا سره راوځي، دا خو په دې معنا نه چې دوی به ضروري په هغه ډله کې وي.

مستنير: يو شی بايد سوء تعبير نه شي.. حزب التحرير هېڅ کله نه غواړي د امتياز له پاره کار وکړي. موږ غواړو امت پر اسلام منګولې ولګوي.

په ټولو مسلمانانو کې داسې ډله له حزب التحرير نه پرته نه شته چې له ملي اجنډا ها خوا د امت د يووالي له پاره کار وکړي. موږ غواړو چې امت د رسول الله په طريقه رهبري کړو، نه دا چې له هر کار نه استفاده وکړو او امتياز پرې واخلو.

په افغانستان کې چې امت د حزب التحرير په لارښوونه په کابل، تخار، بدخشان… کې لاريون کوي، دوی پر موږ اعتماد کوي او د فکر ملاتړ مو کوي. اوس امت له موږ سره منلې ده چې ديموکراسي کفري نظام دی، امت له موږ سره منلې چې له کفارو سره ستراتيژيک او امنيتي قراردادونه حرام دي، امت له موږ سره منلې چې دا واقعيت اشغال شوی دی او آزادۍ ته اړتيا لري؛ نو حزب التحریر امت ته هغه طريقه وړاندې کوي چې د خلافت له تاسيس نه مخکې بايد له کومو لارو چارو استفاده وکړي او بيا چې يې دولت جوړ کړ، څه ډول پرې اسلام تطبيق او نړيوالو ته حمل کړي.

ژمن: په افغانستان کې څه ډول مبارزه کوئ؟ وسله واله مبارزه، که يوازې سياسي؟

مستنير: دوه مسئلې بايد تفکيک شي، يو دا چې حزب التحرير يو سياسي حزب دی، او د دې آيت شريف په اساس باندې رامنځ ته شوی چې الله تعالی فرمايي: «ولتکن منکم امة يدعون الی الخير ويامرون بالمعروف وينهون عن المنکر واولئک هم المفلحون» يعنې: خامخا به له تاسو (اسلامي امت) څخه يوه ډله وي، چې خير(بشپړ اسلام) ته به دعوت کوي، امر به په معروف کوي او له منکر څخه به نهی کوي او همدوی به د فلاح او خلاصون وړ وي.  کله چې تاسې حزب التحرير ته د يوه سياسي حزب په نظر ګورئ، بايد د نورو ګوندونو په څېر يې ونه بولئ؛ ځکه نه حزب التحرير په نورو قياسېږي او نه نور په حزب التحرير قياس کېدلی شي. موږ د اسلام په شکل د تېر آيت د مصداق له پاره د هماغې ډلې په څېر رامنځ ته شوي يو چې قرآن ورته اشاره کړې. موږ امر بالمعرف کوو، نهې عن المنکر کوو او بشپړ اسلام ته خلک رابولو. بشپړ اسلام په دې معنا، چې د اسلام ټولو اقتصادي، سياسي، ټولنيز، تعليمي، کورني، بهرني سياست او … برخو ته خلک رابولو، ترڅو امت او احزاب يې د اسلام له مخې خپلې ګټې او زيانونه وټاکي.

زموږ لومړی کار تثقيف دی. يعنې موږ يوه شمېر کسان په اسلامي ثقافت برابروو، بيا د هغوی د شخصيتونو له بشپړ تغيير وروسته، هغوی له حزب سره يوځای کوو، هغوی بيا له امت سره د ډله ييز تثقيف او تفاعل (فکري عمل او سياسي مبارزې) په موخه کار کوي، ترڅو په امت کې عامه رايه د اسلامي خلافت د تاسيس له پاره برابره شي. کله چې پوه شوو چې په ټولنه کې مثبته عامه رايه جوړه شوې ده، ورپسې اهل قدرت قانع کوو او د اسلامي دولت لومړنۍ هسته رامنځ ته کوو.

ژمن: تاسې اوس په کومه مرحله کې ياستئ؟

مستنير: موږ په نړيواله سطحه د رسول الله صلی الله عليه وسلم پر طريقه کافي حزبي کتله تثقيف کړې ده او په امت کې مو هم پياوړې عامه رايه رامنځ ته کړې، يعنې د رسول الله صلی الله عليه وسلم د بدلون د طريقې د تثقيف او تفاعل مرحلې مو بشپړې کړې دي، نو د نظام په اډانه کې د اسلام د بشپړ تطبيق او نړيوالو ته د دعوت او جهاد له لارې د اسلامي دعوت د رسونې لپاره، له اهل قدرت څخه د (طلب النصرې) په انتقالي حالت کې يو، چې د اوس او خزرج د مشرانو په څېر به اهل قدرت له بشپړ قناعت وروسته حزب ته د چارو واګې سپاري، چې هغه مهال به د الله سبحانه وتعالی په اذن سره د اسلامي دولت لومړنۍ هسته رامنځ ته شي. په افغانستان کې هم موږ د دعوت د دويمې مرحلې (تفاعل) د مرحلې د بشپړتيا په درشل کې يو؛ خو دا چې افغانستان يو اشغال شوی هېواد دی، د افغانستان د واکمنانو واک په مستقيم ډول د يرغلګرو تر واک لاندې دی، يعنې دلته موږ کوم جنرال نه وينو چې د امريکا له مشورې پرته، خپله آزاد فکر وکړي، له موږ سره قناعت وکړي او سبا له موږ سره په طلب نصره کې مرسته وکړي، له همدې امله موږ دلته د (طلب النصرې) کومه هڅه نه لرو.

ژمن: تاسې په افغانستان کې د حکومت مخالف ياستئ، خو مبارزه مو نظامي نه ده. بلکې يوازې فکري؟

مستنير: سياسي حزب نظامي مبارزه نه لري، سياسي حزب يوازې سياسي کار کوي. موږ د رسول الله صلی الله عليه وسلم په طريقه د امت د نهضت او اساسي تغيير او بدلون له پاره کار کوو او د رسول الله صلی الله عليه وسلم په طريقه کې جهاد د تغيير طريقه نه ده. لکه څنګه چې يو شمېر نور فرایض لکه لمونځ، روژه، زکات او … د تغيير او بدلون طریقه نشي کېدلی.

رسول الله صلی الله عليه وسلم هغه وخت وسله واله مبارزه کړې ده، چې دولت يې تاسيس کړی دی. په حزبي شکل، موږ چې تر کومه وخته دولت نه وي تاسيس کړی، نظامي مبارزه نه کوو. لکه څنګه چې لمونځ او حج په حزبي لحاظ نه تنظيموو جهاد هم په حزبي لحاظ نه تنظيموو. هر چېرته چې د جهاد په شمول د هرې فريضې شرايط رامنځ ته شي، حزبي غړي هغه فرض له امت سره يو ځای ترسره کوي. مګر د سياسي حزب په اډانه کې لکه څنګه چې د لمانځه، روژې او حج امور نه تنظيميږي، د جهاد موضوع هم نه تنظيموو، خو دا د دې معنا نه لري، چې حزبي غړي، لمونځ، روژه، زکات او … نه ترسره کوي.

ژمن: د طالبانو په اړه څه نظر لرئ؟ د دوی وسله واله مبارزه تاييدوئ او که يې نه منئ؟

مستنير: موږ د اسلامي امت په منځ کې د اسلام پر بنسټ د هغوی د راپاڅولو او بيدارولو لپاره کار کوو. ټول هغه مسلمانان چې يا د اشغال په وړاندې مبارزه کوي، يا د دې کفري نظامونو په وړاندې د شرعي احکامو پر اساس فکري، سياسي او نظامي مبارزه کوي، د دې حرکاتو کار صحېح دی، خو د حل لار نه ده. طالبان له ځينو اشتباهاتو سره-سره بيا هم د اشغال د دفعې له پاره جهاد کوي، خو د رسول الله صلی الله عليه وسلم په طريقه د دولت د تاسيس او د بنسټيز تغيير له پاره متمرکز فکري او سياسي کار د امت لپاره يوازنۍ حل لاره ده او دا بايد په امت کې د ريښتيني اسلامي دولت تر تاسيس پورې دوام پيدا کړي.

نو موږ طالبان هم د اسلامي ډلې په توګه منو.

ژمن: ويل کېږي چې حزب التحرير د اسلامي دولتونو په پوځ کې هم کار کوي، تاسې د افغانستان پوځ او پوليسو کې کسان لرئ؟

مستنير: لومړی: خو په اسلامي خاورو کې اصلا اسلامي دولت نشته، دا ټول غير اسلامي نظامونه او ښکېلاکګرو ته وفادار رژيمونه دي. له همدې امله موږ د دغو لاسپوڅو نظامونو د نړولو لپاره مټې رانغښتې دي. ترڅو ريښتينی اسلامي نظام رامنځ ته کړو. دویم: نه. زموږ غړی په پوځ کې کار نه شي کولای، خو د اسلامي خاورو د کفري نظامونو په پوځونو کې يو شمېر داسې پوځيان او جنرالان شته چې هغوی مستقيما له کافر نه احکام او قومانده نه اخلي، بلکې له يوه فاسق مسلمان نه يې اخلي. دوی موږ دعوتوو، چې يوه ورځ مسلمانانو ته قدرت تسليم کړي.

ژمن: تاسې د حکومتونو سخت مخالف ياستئ، کافر يې بولئ، د دوی په مقابل کې کار کوئ او وسله واله مبارزه هم تاييدوئ، يوه پوښتنه دا رامنځ ته کېږي، چې ستاسې په مقابل کې دومره جدي غبرګون نه ښودل کېږي، لکه د نورو اسلامي ډلو په مقابل کې چې ښودل کېږي.

مستنير: کومه ميډيا چې زموږ په مقابل کې واقع ده، هغه د غرب ميډيا ده، ټولې نړيوالې ميډيا پر موږ تحريم لګولی، په ډېرې سختۍ زموږ يوه مرکه په رسنۍ کې خپرېږي، زموږ خپل مطبوعات شته، خو دومره قوي نه دي لکه د رابرت مردوخ مطبوعات چې دي. رابرت مردوخ هغه يهودی دی چې د کانګرېس له خوا په افغانستان کې مطبوعاتي پروژې پلې کوي.

يعنې د غربي ميډيا د سيطرې له امله، خلک چې پر موږ کوم قضاوت کوي هغه د همدې غربي ميډيا له سترګو وي او دوی تل هڅه کوي چې موږ له نورو سره وتړي.

په ۲۰۰۵م کال کې، په انديجان کې زموږ په زرګونو کسان قتل عام شول، تاسې به يې په اړه يو راپور نه وي اورېدلی. د ازبکستان په بنديخانو کې تر اتو زرو ډېر زموږ کسان بنديان دي. آیا دا جدي عکس العمل نه دی؟ په افغانستان کې له ۲۰۰۹م کاله نه وروسته زموږ دعوت علني شوی دی، له دې وروسته يوه ورځ هم د افغانستان بندي خانې زموږ له وروڼو نه دي خالي شوي. په پاکستان کې هره ورځ زموږ کسان نيول کيږي. د حزب التحرير ولایه پاکستان وياند ښاغلی نويد بټ له دوه کلونو راهيسې تښتول شوی، د سوريې پاڅون وال له همدې امله دومره ربړول کيږي، چې له سياسي پلوه يې ډېری مشرانو د حزب سياسي اجنډا منلې او هره ورځ دغه فکر پکې لا بنسټيز کيږي.

ژمن: خو تاسې د سيف الله مستنير په نامه په کابل کې ګرځئ، مرکې هم کوئ او آن په تلويزيونو کې هم راښکاره کېږئ. نور ځينې غړي مو شته چې خلک يې پېژني، خو څوک څه ورته وايي نه؛ خو که د القاعدې يا نورو مخالفو ډلو وياندان په کابل کې ستاسې په څېر وګرځي، همداسې به پاتې شي؟

مستنير: دا بايد قياس نه شي، ذبيح الله مجاهد د يوې نظامي ډلې وياند دی، او سيف الله مستنير د يوې فکري او سياسي ډلې وياند دی. نظامي فعاليت حکومت مستقيما او ډېر خوږوي، خو موږ فکري کار کوو او امت ويښوو، دا داسې کار دی چې دوی د خپلو قوانينو له مخې هم ورسره مخالفت نه شي کولای. خو دا هم بايد هېره نه کړئ، چې زموږ ګڼ شمېر ملګري په زندانو کې دي.

حکومت موږ په آرامه نه پرېږدي. تاسې به څو مياشتې مخکې ليدلي وي چې حکومتي استخباراتي کړيو په ډېره پراخه کچه پوسټرونه او بروشرونه وېشلي او خپاره کړي وو او هر چا چې د دې مخه نيولې، امنيت يې مخې ته درېدلی دی؛ نو په غالب ګومان، دا کار د افغانستان ملي امنيت کړی دی.

ژمن: د حزب التحرير عمومي مرکز چېرته دی؟

مستنير: په ځينو هېوادونو کې، لکه تونس، سوډان، اندونيزيا، لبنان… چې احزابو ته په کې دومره مشکلات نه شته، هلته موږ عملا مطبوعاتي دفترونه لرو، چې پر سر يې لوحه لګېدلې او د حزب نوم پرې ليکل شوی. خو د پاکستان، افغانستان، ازبکستان، قرغزستان په څېر هېوادونو کې قوانين موږ نه پرېږدي، چې علني دفترونه ولرو. دوه کاله مخکې، په دوبۍ کې په يوه نندارتون کې زموږ کسانو حزبي کتابونه نندارې ته وړاندې کړي وو، په نندارتون کې هغه نندارخونه وتړل شوه، کتابونه هم واخيستل شول او هغه کسان هم بنديان شول.

زموږ تر ټولو څرګند مرکز، د حزب مرکزي مطبوعاتي دفتر دی. زموږ مرکزي وياند عثمان بخاش دی، د لبنان په طرابلس ښار کې دی. پاتې شو د امير دفتر، لکه څرنګه چې زه خپل کارونه پرته له رسمي دفتره تنظيموم، همداسې نور وروڼه هم خپل کارونه له رسمي دفتر پرته تنظيموي.

ژمن: ويل کېږی چې ستاسې مرکزيت په اروپا کې دی. هلته خپل مسجدونه او ښکاره مرکزونه لرئ او افغانستان ته هم دغه فکر له اروپا نه راغلی؟

مستنير: دا ډېره مهمه نه ده چې له کومه راغلی، ځکه فکر فکر دی، هغه که له اروپا نه راغلی او که له منځني ختيځ نه، هماغه د رسول الله صلی الله عليه وسلم فکر دی. خو څنګه چې موږ په اروپا کې کار کوو، دغسې په افغانستان، تاجکستان او ازبکستان کې هم کوو.

که څه هم په انګلستان او امريکا کې قوانين آزاد دي او موږ ته دومره مشکلات نه شته، خو بيا هم موږ په آرامه نه پرېږدي او ډول- ډول دسيسې جوړوي. مثلا د انګلستان لومړي وزير، ډېوېډ کامرون د کمپاين پر مهال ويلې چې که زه قدرت ته ورسېږم، حزب التحرير بندوم؛ ځکه چې دوی اسراييلي دولت نامشروع بولي؛ خو چې قدرت ته راغلی، په هغه ټولنه کې د هغوی د ارزښتونو لکه د بيان او عقيدې د مطلقو آزادي ګانو د شتون له کبله يې زموږ قطعي مخه نه ده نيولې، خو په اروپا کې هم دې سرحد ته خبره رسېدلې چې په جرمني کې حزب التحرير ممنوع شوی او کېدای شي په نورو کې هم ممنوع اعلان شي.

ژمن: د وخت په تېرېدو سره حالات بدلېږي، علما وايي چې اسلامي فقه هم له وخت او ځای سره بدلېږي. د حزب التحرير فکر د وخت او ځای له بدلون سره د څومره بدلون قابليت لري؟

مستنير: د دوو شيانو فرق بايد وکړو. دا قاعده چې په فقه کې رامنځ ته شوې، چې شرعي احکام د وخت او ځای په بدلون سره بدلېږي، دا د اسلام د تحريف له پاره وضعه شوې قاعده ده، دا شرعي قاعده نه ده. خو اسلام دا وړتيا لري چې د قيامت تر ورځې د بشر ستونزې حل کړي. خو دا ستونزې د احکامو د بدلون پر بنسټ نه شي حل کېدای. بلکې دا په هغه حالت کې کېدای شي چې په امت کې اجتهاد وي، مجتهدين به له هر وخت سره سم له قرآن او سنت نه احکام اسنتباطوي. حزب التحرير له دغه فکر سره چې اسلام له واقعيت سره تغيير مومي، کاملا مخالف دی. مګر د واقعيتونو له پاره مجتهدين لري او له قرآن او سنتو نه د دغو نويو واقعيتونو لپاره اجتهاد کوي او شرعي احکام ورته وړاندې کوي.

اوس موږ خپل فکر د وخت د بدلون له پاره دومره نه شو بدلولای چې ډيموکراسي ومنو او خلافت پرېږدو. د ديموکراسۍ منل اجتهادي مسئله نه ده. خلافت د اسلام سياسي نظام دی.

ژمن: ستاسې ټول فکر د خلافت په رامنځ ته کولو څرخېږي، د خلافت رامنځ ته کول خو څه آسانه خبره نه ده. تاسې غواړۍ دومره مخکې لاړ شئ او د هغه وخت سياسي نظام په يو ويشتمه پېړۍ کې پلی کړئ. د دې له پاره څه پلان لرئ؟

مستنير: خلکو ته داسې ښکاري چې موږ څوارلس سوه کاله شاته ځو او خلافت غواړو، داسې نه ده. خلک باید پر دې فکر وکړي چې د انسانانو مادي ژوند له آدم عليه السلام نه تر اوسه پورې تغيير کړی. موږ په مادي شکل عقب ګرايي نه کوو، بلکې د رسول الله صلی الله عليه وسلم نظام به اوسنی مادي ژوند يو ځل بيا تنظيموي.

اوس د دې له پاره پلان، هماغه د رسول الله صلی الله عليه وسلم طريقه ده. رسول الله صلی الله عليه وسلم اول د اصحابو يوه کتله جوړه کړه، هغوی له ولس سره تفاعل (فکري عمل او سياسي مبارزه) وکړه، د ولس ټولې حرامې نظريې او رواجونه يې په شديده توګه وننګول او بالاخره يې له منځه يووړل. نن هم پر موږ کفري او وضعي قوانين پلي کېږي، مسلمانان د پارلمان او ډېموکراسۍ حکم نه پېژني…. حزب التحرير دغه مسايل امت ته بيانوي، له هغوی څخه غواړي چې د ژوند په ټولو برخو کې د بشري قوانينو پرځای پر الهي شريعت باندې منګولې ولګوي. کله چې عامه رايه جوړه شوه او دوی يو اکثريت ته ورسېدل، بيا د (طلب النصرې) انتقالي مرحله رارسېږي. اوس په دغو تېرو شپېتو کلونو کې په اسلامي امت کې کار شوی، اوس موږ دغه انتقال مرحلې ته رسېدلي يو، معنا دا چې د اسلامي امت د اصلي قدرت خاوندان دې ته برابروو چې موږ ته واک وسپاري. موږ په ترکيه، پاکستان، بنګله دېش، مصر او د اسلامي نړۍ د نورو هېوادونو په پوځونو کې کار کوو چې واک موږ ته راوسپاري.

د تفاعل په ترڅ کې بايد خلک دغه ډول نظام ته تيار وي، داسې نه وي لکه د طالبانو نظام چې دوی به خلک لمانځه ته هڅول، هغوی ګومان کاوه چې استبداد پرې کوي. په ټولنه کې د لمانځه د قايمولو طريقه دا ده چې تارک صلاة ته بايد د شرعي محکمې د حکم له مخې تعزيري جزا ورکړل شي، نه دا چې لاره کې ځنځير واچول شي او په اودس لرونکي او بې اودسه خلکو لمنځونه وشي.

زموږ له نظره، په اسلام بشپړه سنمباله يوه کتله بايد وي، هغه باید په امت کې کافي عامه رايه رامنځ ته کړي، ورپسې يو شمېر اهل قدرت ته به قناعت ورکوي، نو دلته به د اسلامي دولت لومړۍ هسته رامنځ ته کېږي. دا چې موږ نړيوال کار کړی، وروسته کولای شو، چې ډېره ژر دغه هسته پراخه کړو او له غرب سره د اسلامي امت هر ډول نامشروع اړيکې پرې کړو.

ژمن: څه فکر کوئ څومره وخت کې به مو خلافت راولئ؟

مستنير: موږ په دې تسلط نه لرو او نه شو ويلای چې کله به خلافت رامنځ ته کوو. دا د الله سبحانه وتعالی له تقدير او مرستې سره سم راځي… په داسې حال کې چې د کفارو بېلابېل څېړنيز مرکزونه د دغه نړيوال نظام راتګ د همدغه پېړۍ د دويمې او دريمې لسيزې په جريان کې ګڼي او سخت ورڅخه په وېره کې دي.

ژمن: تاسې چې خپل کار ته ګورئ، څه فکر کوئ څومره کار مو کړی او خلافت ته څومره نږدې شوي ياستئ؟

مستنير: که الله تعالی وغواړي، سبا هم دا کار کېدای شي. موږ هڅه کوو چې څومره ژر راشي، يعنې د سبا پر ځای نن، خو دا چې الله سبحانه وتعالی نه غواړي، يا صفونه پاکوي، يا ځينې نورې مفکورې ناکامې ثابتول غواړي، ځکه يې اوس نه دی رامنځ ته کړی. اوس موږ ځينو غربيانو غوندې دا وړاندوينه نه شو کولای.

دغه خلافت چې داعش رامنځ ته کړی، دا د اصلي خلافت د بدنامولو له پاره جوړ شوی. کومو حرکتونو چې هدف يې خلافت نه و، اوس وايي چې زموږ هدف هم خلافت دی، خو اوس د ډيموکراسۍ له لارې مخکې ځي، دا ټول زموږ له فکر څخه د هغوی تاثر دی. اوس خلک پوه شوي چې له خلافته پرته بله لار نه لرو.

ژمن: فرض کړو تاسې خلافت رامنځ ته کړ، خليفه څنګه انتخابوئ؟

مستنير: که موږ د اسلامي امت په پوځونو کې خلکو ته قناعت ورکړی وي، نو دوی به زموږ له امير سره بيعت کوي. خو موږ چې په کومه ورځ خلافت ونيسو، د ټولو اسلامي خاورو له مخلصو اسلامي احزابو، قبايلو او مشرانو سره به په مشوره هغوی په واک کې شاملوو او بالآخره د خلافت لومړۍ هسته به رامنځ ته کېږي. موږ داسې نه کوو چې د امت واک غصب کړو. کله چې زموږ له امير سره د خليفه په توګه بيعت وشي، هغه بيا د حزب امير او آن غړی هم نه دی، بيا اميرالمؤمنين دی. دغه خلافت کې به ټولو مسلمانو ډلو ته سهم ورکول کېږي. زه ډاډه يم، کله چې په سمه طريقه خلافت راځي او د مؤمنانو له ريښتينی امير سره بيعت کيږي، هېڅ مخلصه ډله به د هغه له بيعته انکار نه کوي.

دا خو به لومړی وار وي، مطلب دا چې خلافت نه شته او له نشت نه وروسته له خليفه سره بيعت کېږي، وروسته که بيا امير مړ کېږي، يا د چارو له سمبال نه عاجز کېږي او يا په بل هر حالت د خلافت پوست خالي شي، بيا به د حل و عقد د شورا له لارې د امت استازي بل خليفه يا امير ټاکي او ورسره به بيعت کوي.

ژمن: که د خلافت له رامنځ ته کېدو وروسته، ستاسې له امير سره دغسې اختلاف وشي، لکه له داعش سره چې کېږي، له هغو سره به څه کوئ؟

مستنير: دې ته بايد فکر وکړو چې څوک يې نه مني؟

ژمن: مسلمانان يې نه مني. لکه د داعش له خلافت سره چې مخالف دي.

مستنير: داعش کله د رسول الله صلی الله علیه وسلم په طریقه نظام راوستئ؟ کله يې نړيوال کار کړی؟ د داعش اصل څوک پېژني؟ اوس يې چې خلک په څه پېژني، هغه يوازې جنايت او له اسلام څخه منحرف فهم دی. حزب التحرير جنايت نه دی کړی او لږ تر لږه په يوه اسلامي حکم يې لا تراوسه له چا سره معامله نه ده کړې. داعش خو هره شېبه معامله کړې، هره لحظه يې اسلام بدنام کړی. موږ له راتلونکي اسلامي خلافت سره د مخالفت تصور نه کوو؛ ځکه، د نړۍ هرې برخې ته موږ د خلافت مفکوره رسولې ده. د خلافت لپاره مو دستور (اساسي قانون) يوازې د قرآن، سنت، اجماع او قياس پر بنسټ د شرعي اجتهاد له لارې د دليل د قوت له مخې امت ته وړاندې کړی او د امت د سیاسي، اقتصادي، اجتماعي، تعليمي او … ژوند لپاره مو هراړخيزه يوازې شرعي کړنلاره تياره کړې ده.

مګر بيا هم يو شمېر مخالفتونه به پيدا شي، خو زه ډاډ درکوم، دا به هغسې مخالفتونه نه وي. يا به کېدای شي د ځينو استخباراتي کړيو مخالفتونه وي. له هغوی سره به موږ فيصله کوونکی تعامل کوو، لکه څنګه چې علي رضي الله عنه له خوارجو سره وکړ.

خو که د اسلامي نړۍ مخلصين مخالفت وکړي، موږ ډاډه يو چې هغوی به پنځه ورځې مخالف وي، موږ ورځو، د شريعت پر معيار د افهام او تفهيم په نتيجه کې ټوله ستونزه ورسره حل کوو.

ژمن: که له دوی سره کومې نتيجې ته ونه رسېدئ؟

مستنير: په هغه صورت کې د يوه نفر مخالفت د هغه خپله غلطي ده. دوی بيا د خلافت مشروعيت تر سوال لاندې نه شي راوستلای.

ژمن: که د خلافت اهميت او حيثيت ته په دين کې وګورو، همدومره مهم دی چې تاسې ورته ګورئ؟ معنا دا چې، خلافت وسيله ده، هدف نه دی. ګومان نه کوئ چې له وسيلې مو هدف جوړ کړی؟

مستنير: خلافت يوې خوا ته پرېږده، اسلامي حاکميت په نظر کې ونيسه. که څوک په حکم بما انزل الله فيصله نه کوي، ظالم او فاسق دی، او که پرې باور نه لري، کافر دی. معنا دا چې خلافت دومره مهمه وسيله ده، چې آن د هدف مقام ته رسېږي. ځکه له رسول الله وروسته د اسلام د تحکيم لپاره د هغه له ځايناستي (خليفه) سره بيعت کيږي، ترڅو د رسول الله صلی الله عليه وسلم راوړی شريعت پر خلکو حاکم کړي او نړيوالو ته يې د دعوت او جهاد له لوري ورسوي.

ژمن: په اسلامي نړۍ کې ډېر علما په دې باور دي چې اسلام يو معلوم سياسي نظام نه لري. همدا لامل دی، چې کله رسول الله صلی الله عليه وسلم وفات کېږي، له راتلونکي سياسي نظام سره ډېر سرسري تعامل کوي او خپل ځای ناستی هم نه ښيي.

مستنير: رسول الله داسې يوه کتله له ځانه وروسته پرې ايښې وه، چې څلور ويشت کاله يې په ډېرو سختو شېبو کې په خپل لاس روزلې وه. هغه وخت کې وحې راتله، د دوی د ستونزو علاج يې کاوه او دوی تثقيف کېدل. د خليفه ټاکل رسول الله صلی الله عليه وسم همداسې پرې ايښي. يعنې د انتخاب اساليب يې امت ته پرې ايښې دي، مګر يو کس د بيعت د هغه عقد له مخې خليفه کيږي، چې پر امت يوازې اسلام تطبيق کړي. خو اسلامي نظام د رسول الله په وخت عملي شوی دی، موږ په کې کوم بدعت نه کوو او نه يې کولای شو. رسول الله د خليفه ټاکل امت ته پرې ايښي، خو نظام يې نه دی پرې ايښی. نظام اسلامي و چې لومړی رسول الله صلی الله علیه وسلم په خپلو احاديثو او بیا وروسته صحابه و خلافت وباله.

دغه علما چې وايي، اسلام معلوم سياسي نظام نه لري، دغه نظريه د خلافت د شتون په وخت کې موجوده نه وه. دا خلک د اروپا د فکري انقلاب تر تاثير لاندې راغلي دي او عملا غرب ورته د اسلام د سياسي نظام د مفکورې د محوه کولو په موخه پروژې ورکړې دي. د خلافت مفهوم او اصطلاح لومړی په قرآن، بيا په سنتو او بيا د صحابه وو په اجماع باندې ثابته ده، چې له رسول الله صلی الله عليه وسلم وروسته اسلامي دولت د خلافت په نامه ياد شوی. نو هېڅوک د دې حق نه لري د خلافت په مفهوم باندې دا ډول ناروا تېری وکړي. ځکه دا اوسنی مصحف هم د اصحابو په اجماع تر موږه رارسېدلی دی او د خلافت سياسي نظام هم. نو د خلافت نه منل، که د اوسني مصحف پرځای وضع کړئ، څومره ناوړه موضوع ترې جوړېدای شي. يعنې په امت کې هېڅوک د دې جرئت نشي کولای چې د قرآن دغه مصحف رد کړي. خو د خلافت په اړه دا ډول نظر له اسلام دښمنه مفکورو څخه سرچينه اخلي.

ژمن: که له فقهي اړخ نه ورته وګورو، په اسلامي فقه کې دا بحث شته چې په اسلامي نړۍ کې دوه خليه ګان وي. يعنې د اسلامي نړۍ په هېوادونو کې څو حاکمان حاکميت کولای شي. زيديه شيعه ډله چې اهل سنت ته ډېره نږدې ده، دا نظر لري.

مستنير: دا بحث ډېر متاخر او وروستی دی، تر دې وړاندې صحېح احاديث شته چې د يوه خليفه په شتون کې بل خليفه حاکميت نه شي کولای. يعنې د دويم خليفه بايد سرله تنه بېل شي. کله چې صحېح احاديث شتون ولري، بيا د اجتهاد دروازه بندېږي. اصحابو پر همدغه نبوي طريقه اجماع کړې. د دوی اجماع هم دريم تفصيلي شرعي دليل دی.

ژمن: حزب التحرير هغو مسلمانانو ته په کومه سترګه ګوري، چې په دغه ډله کې نه دي؟

مستنير: کوم کسان چې د کفري نظامونو په حکمي پوستونو کې کار کوي او مسلمانان وژني، طبعا فاسقان او ظالمان دي. کوم قاضيان او نور مشران چې کفر پلی کوي او بغیر ما انزل الله فيصله کوي، هغه هم فاسقان او ظالمان دي او که په زړه کې يې نه مني بيا کافران دي. لکه بشار الاسد. يا قذافي چې له سنتو منکر و. حزب التحرير ورته ديارلس کسه د امر بالمعروف له پاره ورولېږل، هغوی يې ټول شهيدان کړل. په دغه وفد کې د حزب اوسنی امير نه و لېږل شوی، ده په شپو شپو ژړل چې کاشکې خدای ده ته هم د هغوی په څېر د شهادت مقام ورکړی وای.

عام مسلمانان زموږ په نظر فاسقان نه دي، هغوی بايد راويښ کړل شي. خو څوک چې ديموکراسي مني، فاسقان دي.

ژمن: دا په دې معنی چې تاسې د نظر په اختلاف هم نه ياستئ قانع. په اسلام کې خو اصل دا دی چې که چا اجتهاد وکړ او سهوه شو، هغه ته يو اجر دی او که سم و، دوه اجره دي. اوس اخوان المسلمين اجتهاد کوي او ديموکراسي مني، تاسې دا اختلاف نه منئ او هغوی فاسقوئ!

مستنير: د دوی نيت د فاسق نه دی، خو عمل يې په فسق تمامېږي، دا لويه ستونزه او ګناه ده. د ديموکراسۍ موضوع کې چې دوی کوم اجتهاد کړی، دا اصلا اجتهاد نه دی، ځکه دې موضوع کې اجتهاد له قرآن او سنت څخه کيږي، نه له اوسني واقعيت څخه. هغوی اوسنی واقعيت منلی او بيا له اسلام نه د دغه واقعيت د دفاع لپاره دلايل وړاندې کوي، په داسې حال کې چې اوسنی واقعيت بايد د اسلام له غوښتنې سره سم تغيير شي. ديموکراسي قبل الميلاد کې هم وه، خو رسول الله صلی الله عليه وسلم پرې عمل ونه کړ. محمد مرسي چې کوم قانون جوړ کړ، هغه يې خلکو ته ولې وړاندې کړ؟ زموږ په نظر که څوک اسلامي قانون وضعه کوي او ملت ته يې وړاندې کوي چې پلی يې کړي، دا په حاکميت کې له خدای سره شريک نيول دي، ځکه د اسلام تحکيم پر امت باندې الله متعال فرض کړي دي، په دې اړه د خلکو رايه او نظر هېڅ ارزښت نه لري.

ژمن: مننه.

د حزب التحرير د مرکې PDF بڼه

16 comments

  1. they re just the enmy of Allaha they are lying,and it is also very shemfull for yoy that you are claming that we have done by this intrervie seevic to ISLAM or Muslam.

  2. ذبیح الله احمدی

    از خداوند متعال برای برادر ما سیف الله مستنیر موفقیت های بیشتر میخواهم، خداوند شما و همه مسلمین را طلب نصرت خویش بگرداند، و ان شا الله ما مسلمان ها کامیاب و پیروز خواهد شدیم.
    آمین

  3. حق همېشه د باطل د سر مغز ګډوډوي!!!
    احمد يار صاحب! الله جل جلاله د د حق له وضاحت وروسته د کينه کښو زړونه و چوي. موږ دروغ وايو، دا ګڼ اسلامي امت دروغ وايي؟! څه دليل؟! کوم منطق؟! هغه څه چې موږ بدل کړي، د هغې درک ستا له سويې لوړ دی. امت نن د راشده خلافت له لارې د بشپړ اسلام د تطبیق وړ ظرفيت د حزب التحرير په اډانه کې لري. حزب التحرير نن د امت عامه افکار د خلافت ملاتړ ته چمتو کړي دي. او حزب التحرير د دې سبب شوی، چې نن که کومه اسلامي ډله په خپلو اهدافو کې خلافت هدف ونه ټاکي، هغه خلکو ته غير اسلامي او ناقصه ډله ښکاري. همداراز يې د امت په پوځونو کې نفوذ ته مخه کړې، چې ډېر ژر به د الله سبحانه وتعالی په اذن سره د هغه د دين د نصرت جوګه شي.

  4. Dear Ahmad Yaar, fear Allah (swt) before accusing a global organization that is working for re-establishment of Allah’s deen. If you have any argument please bring it on and lets discuss it.
    wasalam

  5. Abdul Kadir Mohmand

    جهاد «جنگيدن در راه حق» دفاع از اسلام دین، وطن، ناموس عزت شرف صلح است در اسلام !
    خواهران برادران مسلمان افغان عزت خاص برای الله (ج) رسول او و مؤمنان است؛ ولی منافقان این را نمی‌دانند!
    وقتیکه کفار بر سر زمین مسلمانان حمله کند بر همه مسلمانان همان سر زمین جهاد فرض عین میگردد، و مکلف اند که قبل از هرکاری باید در مقابل کفار بجنگند. اگر مسلمانان مذکور کافی نبودند بر مسلمانان نزدیک شان فرض میگردد که از آنها دفاع کنند و اگر آنها نیز کافی نبودند، به دیگر مسلمانان فرض میشود.
    هر کسی که با اداره مزدور اجیر صلیبی فعلی کار میکند یا همکاری میکند و یا کفار را دوست خود میداند بر خلاف به مجاهدین الفاظ بد و سخت میگوید مثل تروریست و دهشتگر مانند کفار که برای مجاهدین میگوید پس ایـن قسم افراد که در هر جای وظیفه اجرا میکند منافق هستند و جهاد همراه این قسم افراد نیز فرض عین است.
    کسیکه با حکام مرتد برضد مسلمانان متحد شود کافر است الله (ج) در سوره المائده آیه ۴۴ میفرماید : ( وَمَن لَّمْ يَحْكُم بِمَا أَنزَلَ اللَّـهُ فَأُولَـٰئِكَ هُمُ الْكَافِرُونَ) و هرکس برخلاف آنچه خدا فرسباده حکم کند چنین کسی از کافران خواهد بود .
    دلیل این است که الله (ج) می فرماید (يَا أَيُّهَا الَّذِينَ آمَنُوا لَا تَتَّخِذُوا الْيَهُودَ وَالنَّصَارَىٰ أَوْلِيَاءَ ۘ بَعْضُهُمْ أَوْلِيَاءُ بَعْضٍ ۚ وَمَن يَتَوَلَّهُم مِّنكُمْ فَإِنَّهُ مِنْهُمْ ۗ إِنَّ اللَّـهَ لَا يَهْدِي الْقَوْمَ الظَّالِمِينَ ﴿٥١﴾ ای مومنان یهودیان ومسیحیان را به دوستی نگرید ایشان برخی دوست برخی دیگرند وهرکس از شما با ایشان دوستی ورزد بیگمان از زمره ایشان بشمار می آید تا ” یا ایها الذین آمنوا من یرتد منکم عن دینه ” [ مائده ۵۴ ] ای مومنان هرکس ازشما از آیین خود باز گردد . بیان می کند که هر کس دوستدار کفار باشد کافری مثل آنها ست و با این گفته تاکید می شود : من یرتد منکم عن دینه . وکمک همان دوستداری است : وما کان لهممن اولیاءینصرونهم .آنها دوستی ندارند تا آنها را کمک کند !!!
    جهاد کردن در راه الله(ج) انسـان مجاهد را به یکی از دوصفت موصوف میکنـد یا غازی میشود و یاهم شهید میشود. واین هر دو مرتبه کامیـابی است. که در اثر جهاد کردن نظام آسمانی حاکم، عـدل، انصاف، امن، اطمینان،عـزت،آرامی، پر ده عصمت و حیـا نافـذ میګـر دد،وشـرک،ظلم،فسـاد،غلامی کفار، ختم میګر دد مثلیکه الله(ج) در قران کریم می فرماید: (وَقَاتِلُو هُمْ حَتَّی لاَ تَکُـونَ فِتِـْنَةٌ وَیَکُونَ الـدَّینُ لِلّــهِ ) حکم جهاد که به مسلمانان شـده قرآن کریم شـاهد است کـه الله(ج) به سـر دار دوعالم حضرت محمد صلی الله علیه وسلم خطاب نموده که حکم عام است به تمـام امت اسلامی حکم عام است، که الله جـل جلاله میفرماید: (یَا أَیُّهَا النَّبِيُّ جَاهِدِ الْکُفَّارَ وَالْمُنَا فِقِینَ) الایه از این آیه کریمه معلوم شد قسمیکه جهاد بالای مؤمنان در مقابل کفار فرض شده همین قسم جهاد بالای مؤمنان در مقابل منافقین هم فرض است، که جهاد با کفار و منافقین هر دو یک سان است چرا که هدف کفار و منافقین هر دو یکی است، که آنها در روی زمـین نظام شیطانی، فساد، ظلم، وبی حیـایی را رایج می سازد به همین سبب بالای مؤمنان لازم است که همراه هر دو فرقه جهاد کند تا اینکه به روی زمـین نظام اسلامی یعنی نظام قرآن و سنت نبوی صلی الله علیه وسلم حاکم شود. به حاکم شدن نظام اسلامی و قرآن تمام مشکلات حل خواهد شد، و به تمام امور عدل و انصاف قـائم میشود. و منافقان را در کتاب الهی و تمام احادیث نبوی نشان داده شده که بعضی از علامات آن دوستی با کفار است، وهمین حالا بعضی اشخاص بی تمیز میگویند که جهاد با خارجی ها صحیح است ولی افراد داخلی را قتل کـردن صحیح نیست. ما میگویم که به آیات قرآن کریم و احادیث نبوی صلی الله علیه وسلم فکر کنیـد هر کسی که با اداره اجیر دست نشانده و مزدور کار میکند و یا کفار را دوست خود میداند منافقین می باشند.
    خداوند حال و وضع هیچ قوم و ملّتی را تغییر نمی‌دهد (و ایشان را از بدبختی به خوشبختی، از نادانی به دانائی، از ذلّت به عزّت، از نوکری به سروری، و … و بالعکس نمی‌کشاند) مگر این که آنان احوال خود را تغییر دهند، و (این سنّت جاری در اسباب و مسبّبات ظاهری است، ولی) هنگامی که خدا بخواهد بلائی به قومی برساند هیچ کس و هیچ‌چیزی نمی‌تواند آن را (از ایشان) برگرداند، و هیچ کس غیر خدا نمی‌تواند یاور و مددکار آنان شود به امید صلح امنیت استقلال، آزادی نظام اسلامی تنفیذ شزیعت .

  6. sabir arsalan

    حزب التحریر یگانه حزبیست که آنرا مخلصین و داعین راه حق و قضیه سرنوشت ساز امروز دریافتم
    پس خلافت به منهج نبوت قایم خواهد شد.
    اگر چه کافران٬ منافقان٬ ظالمان٬ فاسقان٬ دموکراتان٬ سکولران و…. نخواهند.

    …ثم تکون الخلافة علی منهاج النبوة.

  7. فهیم عمر

    مصاحبه طولانی و جالبی بود ولی آنچه جالب بود گریز جناب مستنیر از جواب دادن به اکثریت سوالات بود که این بی ثباتی ارکان این گروه و پراگندگی کارش را نشان میدهد.
    میدانم به اخلاص کار میکنند ولی این ره که اینها میروند به ترکستان است.

  8. زه نور نظر نه لرم خو په دغه مرکه باندی غواړم یو څه ولیکم هیله ده چی ژمن خپاره کړی او مستنیر صاحب ورباندی رڼا واچوی
    —————-
    د ژمن خبره:
    هر څوک چې د ادب په چوکاټ کې علمي رد ليکي، ژمن يې پرته له کوم زړه نازړه توبه خپروي.

  9. ګرانو لوستونکو او مینه والو
    السلام علیکم ورحمة الله وبرکاته
    ما د سیف الله مستنیر په نامه د یوه ښاغلي مرکه چې ځان د حزب التحریر د مطبوعاتي دفتر مشر بولي له سره ترپایه ولوستله او په پای کې دغه لاندې ټکوته ورسېدم:
    پوره دوه کاله وړاندې زه د یوه ورور په بلنه د دوو نورو وروڼو سره مخامخ شوم چې د یوې لنډې ناستې په بهیر کې یې راته د حزب التحریر د غړیتوب بلنه راکړه، زیاتې خبرې مو ښې په رڼه بڼه سره وکړې او په پای کې زما ځواب دا وو چې زه تل یو عادي مسلمان او له هرډول سیاسي خوځښتنو څخه آزاد او بې پرې پاته یم، د هرهغه چا چې د اسلام او هېواد له غوښتنو سره سم عمل وکړي، ستاینه یې کوم او دهرهغه چا عمل او کړنه چې زمونږ له دین او هېواد سره په ټکر کې وي، د هغوی کړنه او عمل ردوم.
    له ښو زیاتو او اوږدو خبرو وروسته زما هیله دا وه چې که زه همداسې بې پرې پرېښودلای شم ښه به وي، چې بیا همداسې وشول.
    په هغه مجلس کې هم داسې څه وو چې نابشپړ او بې ځوابه پاته وو. دا دی اوس د ښاغلي سیف الله مستنیر څخه د ژمن پوښتنو ته په ځوابونو کې هم له هماغه شان کړنې کار اخیستل شوی دی.
    • ډېری پوښتنو ته مستنیر صاحب داسې ځواب وایې لکه چې پوښتل شوې موضوع یوازې په ده پورې اړه لري او د اسلامي امت او دهغه په قضیه او راتلونکي پورې اصلا اړه ونلري.
    • د ځېنو پوښتنو د ځواب په بهیر کې ژمن هم داسې معلومات او یا تشه وینا کافی بللې ده چې هغه ناکافی او ترزیاته حده پورې مشکوکه وي.
    • ښاغلي مستنیر د ازبکستان په هېواد کې د اندیجان په ښار کې خوځښت ته ګوته نېولې ده او هلته یې د مسلمانانو ځوانانو او دده په وینا د حزب التحریر د غړو شهادت، ځورېدنې او بندیخانو ته ګوته نیولې ده. حال داچې هغه پېښه له یوه سره له هغه څه سره په ټکر کې ده چې مستنیر صاحب ورته ګوته نیسي او په ټینګار سره وایې چې زمونو حزب یو سیاسي حزب دی او په پوځي چارو کوم کار نلرو.
    • د ازبکستان په تجربه کې، د ازبکستان د اسلامي حرکت او د حزب التحریر له یوه بل سره نه جوړېدل او په پای کې دوی ټول له یوې مخې د ازبکستان له خاورې لرې کول هغه عملي بېلګه ده چې حزب التحریر ورسره مخامخ دی.
    • مستنیر صاحب یوه عجیبه موضوع مطرح کوي او وایې چې دحزب التحریر مشر ځای ندی معلوم خو دی چې د همدې تنظیم د مطبوعاتی چارو مشر دی بیا د افغانستان په شان هېواد کې ښه خلاص مټ ګرځي او د افغانستان په خاوره هیچا ته دا نه معلومیږي چې مستنیر صاحب دلته تشریف لري ؟؟؟ له دې سره سره بیا هم ټینګار کوي چې کفري نړۍ ورپسې ده او اسلامي کار ته یې نه پریږدي.
    • د جهاد له وخته چې زه ډېر زیات کوچنی هم وم، دا مې ښه په یاد دي چې د جهاد په وخت کې نه عبدالله عزام او نه هم د هغه مرستیال تمیم العدنانی دغې ډلې ته په ښه سترګه کتل، حال داچې د حزب التحریر ډیری مشران د ګران او غصب شوي فلسطین له درنې او پاکې خاورې دي.
    • د اسلامي امت په اړه د ډېرو مشهور مسلمانو او مفکرو څېرو په علمي او تحقیقي اثارو کې د حزب التحریر په اړه داسې کره ثبوب او ددې حزب د کلک ملاتړ کوم څرک نه ترسترګو کیږي چې تل یې د اسلامي امت په درد کې خپله پوهه، قلم او په پای کې خپله وینه او ژوند هم نذرانه کړي دي.
    • په پای کې بیاهم له هر ډول تعصب او بدبینۍ څخه مخکې او په پاکه عقیده خپل مسلمان وروڼه او هېوادوال دې ته را بولم چې د هرې موضوع په اړه کره، کلک او ثابت شویو معلوماتو له لاسته کولو وروسته په هره موضوع کې خپله پریکړه د الله تعالی له لارښوونو او نبوي مبارکو سنتو سره په پوره او بینا سمون کې وکړي.
    اللهم ارنا الحق حقا وارزقنا اتباعه و ارنا الباطل باطلا و ارزقنا اجتنابه
    وما کنا لنهتدی لهذا الدین الحنیف لو لا ان هدانا الله تعالی عزوجل
    اللهم اشهد اللهم انی قد بلغت

  10. برای توجه برادر فهیم عمر!
    اگر راه ما به ترکستان باشد، پس راه رسول الله هم به ترکستان است. لطفا برای معلومات بیشتر و رد ادعای خودت مقاله ذیل را به جزئیات مطالعه فرمایید،‌ تا درک کنید، که یگانه راه تغییر طریقه رسول الله ص است و پیروی آن واجب بوده و تمام مراحل آن توقیفی است.
    http://ht-afghanistan.com/article.php?lang=dari&category=5&aid=2736&parent=42

  11. Hassan Afghan

    کومه ډله چې په اوسني وخت کې يه افغانستان کې د اشغالګرانو په وړاندې جهاد ردوي، هغه به څنګه د مسلمانانو عزت او برم تأمین کړي؟

  12. یک تن از اعضای حزب تحریر برای خلافت دعوت میکرد. روزی نفر آنرا با خانمش دید که اکثر اعضای بدنش عاری بوده نفر برایش گفت شما برای ایجاد خلافت دعوت میکنید پس لازم است که حداقل خانواده تان را اصلاح کنید. عضو حزب تحریر گفت که من برای ایجاد خلافت کار می کنیم وقتی که خلیفه آمد او باز خانم بنده و غیره اصلاح میکند.
    حزب تحریر تنظیم است ولی بهتر از اخوان المسلمین نیست.

  13. عمرخلیل

    سلطانی صاحب!
    تهمتی بزرگتر از این را نیافتید که بر حوانان رشید حزب التحریر می بندید. جوانانی که برای همه ای بخش های اسلام دعوت می کنند و چگونه امکان دارد که کسی خود و خانواده اش را در خطر بیاندازد و برای اقامه خلافت دعوت کند ولی اسلام را بالای زن، دختر و خانمش تطبیق نکند. با این حرف ها و پوچ و پراق گویی ها و تهمت ها، فکر نکنم کسی فریب بخورد. حزب التحریر با همه ای سختی ها در مقابل مشکلات و مصائب سد راه دعوت ایستاد و با هر بادی کوچکی همچو سایر احزاب نلرزید که گاهی خودش را جهادی و گاهی خودش را به دامان دموکراسی بیاندازد.

  14. السلام عليكم برادران حزب التحرير خيلي پیش میرود و خلیفه شان بالا تر از همه اصحاب کرام هستند ،چون صحابه ها خیلفه را به اجتهاد شورای حل و عقد تعین نمود ولی حزب التحریر خلیفه را به مصابه پیامبر ص تعین میکنند جالب است ،
    انحضرت ص خو پیش از خلیفه شدن رسوا خدا بود و همه اومر ان ص به وحی تنظیم شده بود و امور حزب به کدام اساس است؟؟
    برادر این خود بدعت خیلی بزرگ است که شما خلیفه را انتخاب نمیکنید و انتساب شده است؟؟؟
    بلکه نه تنها بدعت خلیفه را بالاتر از اعمال صحابه انتخاب میکنید چون هر خلیفه توسط شورای انتخاب شده ؟
    من نمیدانم که چی قسم گپ است لطف نموده برای بنده واضح گنید برادران گه شما خلیفه معرفی میکنید اپیا نعوذ باالله پیامبر چون خلیفه به رای انتخاب میشه ولی از شما انتخاب شده گی است؟؟؟

  15. ان صحابه ها که عشره مبشره بودند هم به رای انتخاب شد ولی خلیفه شما اتخاب شده گی است ؟؟؟
    بس است برادران
    تغیر هر نظام بکه بوده تا کنون که سر نگون شده به انقلاب شده و انقلاب خو جنگ وقتتل است نه این که تو طرف من میشی یا او ؟؟؟
    انحضرت ص نظام ابو جهل را به جهاد وقتال شکست داد غزوات واضح است
    نظام کمونیست به جهاد وقتال شکست خورد و دیموکراسی خو خود زادگاه مجاهد شد خصوصا در افغانستان که سالانه الحمدلله به هزار ها نفر زیاد میشه در صفوف مجاهدین
    برادران امیر شرعی توسط علما تعین شده و علی الخصوص در باب الجهاد هر قدر امیر بوده میتانه لا وجود یکه امیر شرعی در سطح دنیا شناخته شده است راه دور نمودن دیموکراسی انقلاب است و انقلاب از وقت انحضرت ص تا حال به فتال و جهاد شده ها تنها این راه قتال نه بلکه باید به دین کامل داخل شود دعوت باشد امر باشد و نهی و همه امور دیگر ولی راه تغیر نظام واضح واضح روشن و روشن است که هماه انقلاب است و انقلاب خودش خونریزی را با خود دارد
    (وقاتلوهم حتى لا تكون فتنة و يكون الدين كله لله)

  16. همین افکار ناب اسلامی و طریقه رسول الله صلی الله علیه وسلم میتواند راه نجات وخلاص امت از بدبختی ها و نجات از دوزخ باشد. با احیا تفکر اسلامی میتوان زندگی عزت مند گذشته را برای این امت اعاده کرد. خداوند برادر مستنیر را اجر دهد.

Leave a Reply

Your email address will not be published. Required fields are marked *

*